На 21 декември (сабота) на Филолошкиот факултет „Блаже Конески“ во Скопје со почеток од 11 часот ќе се одржи работилница за академско пишување организирана од тимот на „Како си ми?“.

Овој настан е прв од ваков вид, со идеја да прерасне во традиција доколку форматот се покаже корисен за студентите. Целта на работилницата е да им овозможи на потенцијалните кандидати за учество на наредната конференција да разговараат со професорки од Филолошкиот факултет „Блаже Конески“ и со своите колеги за идеи за истражувања од областа на филологијата, а потоа заеднички да ги преточат во апстракти.
Теми што ќе се обработуваат се стилот и обемот на апстрактот и на истражувачкото прашање, структурата на научниот труд, начините за правилно цитирање и слично.

Работилницата ќе ја водат проф. д-р Мира Беќар и проф. д-р Калина Малеска од Катедрата за англиски јазик и книжевност и проф. д-р Емилија Бојковска и проф д-р Емина Авдиќ од Катедрата за германски јазик и книжевност.
Се надеваме дека овој настан ќе биде добра платформа за студентите да ги прошират своите искуства во областа на академската работа и се разбира поттик да учествуваат со свое излагање на претстојната Шеста студентска филолошка конференција „Како си ми?“

Напоменуваме дека за учество на работилницата потребна е пријава на kakosimi.flf@gmail.com до 10 декември.
Учеството на работилницата е бесплатно и може да се пријави секој студент на прв или втор циклус студии на кој било факултет во државата.