Skopje Light Art District

По урнекот на сличните популарни фестивали низ Европа, за прв пат во Скопје и Македонија, од 6-ти до 9-ти октомври “Skopje Light Art District” на граѓаните ќе им овозможи уникатно доживување исполнето со светлост и многу бои. Фестивалот “Skopje Light Art District” e еден вид нов културно-општествен настан, а отворањето е резервирано за почетокот на Белата ноќ. Замислата на фестивалот е да внесе малку светлина и боја во секојдневието кое го сите го живееме и да ни ја покаже убавата, шареноликата страна на животот. Сите присутни на фестивалот ќе имаат можност да бидат дел од едно ново, интригантно и необично искуство. Фестивали од ваков тип се одржуваат редовно низ Европа и светот, но главната идеја за “SkopjeLight Art District” потекна од РОК (ROCK) проектот, проект на Хоризонт 2020 програмата на ЕУ. Во тој проект, Град Скопје на културно ниво е вмрежен заедно со уште 11 други градови од ЕУ. Еден од тие градови е и Лион во Франција, град со историски и традиционално најстар фестивал на светлосна уметност, кој послужи како еден вид директна инспирација за “Skopje Light Art District”. На фестивалот оваа година ќе настапат 15 артисти од земјата и странство, со најразлични светлосни инсталации, воглавно поставени низ Старата скопска чаршија. Се работи за уметници кои досега учествувале на голем број вакви фестивали. Отворањето на фестивалот започнува во 20 часот на 6 октомври, со светлосна проекција и 3-димензионално мапирање проектирано на зградата Ибни Пајко, на самиот влез на Старатаскопска чаршија. Мотото на фестивалот е “Следи ја патеката“. Посетителите штом ќе пристигнат на местото на проекцијата, ќе ги дознаат и насоките по кои ќе се движи “патеката“ и каде ќе можат да ги видат инсталациите во наредните три дена. Отворањето ќе заврши во 23 часот, во Музејот на современа уметност со интерактивен аудио визуелен перформанс.