Конкурс на тема енергетска ефикасност: Победнички конкурсни трудови

Прво место за дизајн на постер освои конкурсниот труд на Матеа Величковска. Како главен мотив на дизајнот Матеа истакнува дека: „Во преден план при правењето на концептот за постерот беше ставена можноста за човекот да избере што е добро за него и неговото опкружување. Првично, се гледа една индивидуа која спонтано излегува од сопственото превозно средство и отскокнува кон велосипед, притоа избирајќи го патот кон енергетско ефикасниот начин на живеење.“. Kога зборува за тоа како таа ја замислува урбаната средина каде се практикуваат навики за енергетска ефикасност и ефективно користење на обновливи извори на енергија, Матеа вели: „Природа компонирана со уреди кои што соработуваат со неа, а не против. Велосипеди и електрични тротинети на уличните патеки, правејќи го сообраќајниот метеж да исчезне, инвертер клими во затворени простори, соларни панели на сите објекти, соларни оџаци коишто овозможуваат производство на чиста енергија, сите обоени во зелена боја, бојата на екологија.“. Својата визија Матеа ја претставува и во нејзиниот дизајн за беџ, со кој го освои второто место за дизајн на беџ, кој понатаму беше дополнително прилагоден за да биде достапен во две верзии.

Второ место за дизајн на постер освои конкурсниот труд на Моника Саздова. Во својата апликација на Конкурсот, таа исто така сподели повеќе за мотивацијата: „Инспирацијата за главниот елемент (светилка со порака „Не заборавај да ја исклучиш светилката“) ја најдов во значењето на малите постапки, па така, иако е мал чекор, редовното исклучување на светилка може да доведе до создавање на здрави навики во насока на енергетска ефикасност, заштеда на електрична енергија и заштита на животната средина.“.

Прво место за дизајн на беџ освои конкурсниот труд на Наиле Емини. Во име на својот дизајн таа истакнува „Патот кон по чиста иднина е нареден со дела како запчаници во некоја машина. Некој запчаници се големи, некој мали, но секој еден запчаник има свое место во машината и ако фали некој таа нема да работи. Еден од нив си и ти!“.